ഇടുക്കി: മുല്ലപ്പെരിയാർ അണക്കെട്ടുമായി ബന്ധപ്പെട്ട വിഷയത്തിൽ കേരളത്തിന്റെയും തമിഴ്നാടിന്റെയും താൽപര്യങ്ങളും ആശങ്കകളും ഒരുപോലെ പരിഗണിക്കുമെന്ന് പാർലമെന്ററി സ്റ്റാൻഡിങ് കമ്മിറ്റി ഓൺ വാട്ടർ റിസോഴ്സസ് ചെയർമാൻ രാജീവ് പ്രതാപ് റൂഡി.
മുല്ലപ്പെരിയാർ വിഷയത്തിൽ വിശദമായ വിലയിരുത്തലിനായി ജലവിഭവ പാർലമെന്ററി സ്റ്റാൻഡിങ് കമ്മിറ്റി ഇടുക്കിയിൽ യോഗം ചേർന്നു. അണക്കെട്ടിന്റെ സുരക്ഷയും തമിഴ്നാടിന്റെ ജലലഭ്യതയും ഒരുപോലെ പരിഗണിച്ചുകൊണ്ടായിരിക്കും വിഷയത്തെ സമീപിക്കുകയെന്ന് രാജീവ് പ്രതാപ് റൂഡി വ്യക്തമാക്കി.
അണക്കെട്ടിന്റെ സുരക്ഷ ഉറപ്പാക്കുക, അതോടൊപ്പം ജലലഭ്യത ഉറപ്പാക്കുക എന്നീ രണ്ട് പ്രധാന വിഷയങ്ങളാണ് സമിതിയുടെ പരിഗണനയിലുള്ളത്. ദീർഘകാലമായി തുടരുന്ന മുല്ലപ്പെരിയാർ തർക്കത്തിന് സമതുലിതമായ പരിഹാരം കണ്ടെത്തുകയാണ് ലക്ഷ്യമെന്നും സമിതി വ്യക്തമാക്കി.
ഇരു സംസ്ഥാനങ്ങളും മുന്നോട്ടുവച്ച സാങ്കേതികവും നിയമപരവുമായ വാദങ്ങൾ വിശദമായി പരിശോധിച്ച ശേഷമായിരിക്കും സമിതി ശുപാർശകൾ തയ്യാറാക്കുക. കേരളത്തിന്റെയും തമിഴ്നാടിന്റെയും ന്യായമായ ആവശ്യങ്ങളും ആശങ്കകളും തുല്യമായി പരിഗണിക്കുമെന്നും സമിതി അധ്യക്ഷൻ അറിയിച്ചു.
മുല്ലപ്പെരിയാർ അണക്കെട്ടിന്റെ സുരക്ഷയും തമിഴ്നാടിന്റെ ജലാവകാശവും സംബന്ധിച്ച തർക്കത്തിൽ കേന്ദ്രതലത്തിലുള്ള ഈ വിലയിരുത്തൽ നിർണായകമാണ്. സമിതിയുടെ തുടർ ശുപാർശകൾ ഇരു സംസ്ഥാനങ്ങളുടെയും നിലപാടുകൾക്ക് പുതിയ ദിശ നൽകുമെന്നാണ് പ്രതീക്ഷ.